والله لأنشر هذه التدوينة, افتكر انك حلفت

(لا يا سيدي مش لازم تنشرها. و خلليني أتكلم المرة دي بالعامية عشان كلامي يوصل لناس معينة من غير إي محسنات بديعية أو استعارات مكنية.)

الجمل دي موجودة كتير ع النت:

- "والله لاعمل لايك, افتكر انك حلفت"

- "في رقبتك ليوم الدين ؛ لا اله الا الله محمد رسول الله ؛ ارسله لخمس جروبات"

- "بالله اعليك انشرها امانه فى رقبتك الى يوم الدين"

(ملحوظة: الهمزات البايظة دي مش أنا اللي كاتبها, دا أصحابها هما اللي كتبوها كدا)

و غيرها جمل كتيــــــر منتشرة, و الشباب عمالين ينشروا المواضيع اللي فيها الجمل دي إما عشان اتزنقوا بالحلفان أو عشان فاكرين نفسهم بيعملوا خير و بينشروا معلومات قيّمة. و للأسف الموضوع دا فيه نقطتين مهمين لازم حد يوضّحهم عشان الدنيا ظاطت قوي, و ناس كتير معرفتها على قدها و محتاجة حد يوعيها.

أولا: الحلف على الغير:

لما حد يحلف عليك و يقوللك "و الله لاتعمل كذا" أو "والله مانتا جايب كذا", فإنت مش ملزم بحاجة خالص, و حتى لو عملت عكس اللي هو حلّفك تعمله فمافيش عليك أي إثم. بل بالعكس, هو اللي لازم يكفر عن اليمين (الحلفان يعني) بتاعه لو كان قاصد انك يجبرك على حاجة, ولو كان قصده مجرد النصيحة فمافيش عليه أي كفارة. خلاصة القول انك في السليم و مش مجبر على حاجة.

ثانيا: الموضوع اللي بتنشره:

من مواضيع طبية, لأخبار سياسية مفبركة, لمعلومات دينية و أحاديث (و دي الأغلبية) ضعيفة أو إسرائيلية! هل متخيل موقفك قدام ربنا لما تنشر حديث منسوب لسيدنا محمد و هو حديث غلط؟ هل متخيل موقفك قدام ربنا لما تنشر معلومة بتتهم شخصية عامة بالخيانة أو الكفر؟ كل متخيل كمية الذنوب اللي هاتاخدها بكل واحد صدقها أو نشرها لعشرة كمان؟ . فاكر الورقة اللي كانت بتتوزّع زمان و يقوللك لو ماصوّرتهاش 20 نسخة و وزّعتها هاتحصللك مصيبة؟ ياترى فكّرت تشوف أصل القصة دي صح ولا لأ؟ و ليه واحد يحلّفك انك تنشر "لا إله إلا الله" في 5 مواقع بالتحديد أو ترسلها لـ 20 صديق؟ مش دا بيحاول ينشر "تقليعة" مرتبطة بأرقام مالهاش اي علاقة بالدين؟

مش هاطلب منك تروح لدار الإفتاء أو حتى تكلمها, لكن ع الأول دوّر على المعلومة على جوجل. لو معلومة دينية دوّر في نتايج البحث عن المواقع المتخصصة في الأحاديث أو الفتاوى. لو معلومة سياسية دوّر في مواقع الأخبار المعروفة... و هكذا.

حتى حكم الحلف على الغير اللي أنا قولته في الأول, مهما كان مقنع فأنا مش عالم في الدين, ويمكن أبقى حاطط معلومة مش صح 100 في الـ100 , فلازم تدوّر على الحكم بنفسك و تتأكد. أنا فكّرت أسيبك تدوّر بنفسك, بعدين قولت بلاش أصعّبها من الأول كدا و خلليني أديك لينك تبتدي منه عشان تعرف الكلمات اللي ينفع تدوّر بيها. اللينك أهو:

http://islamic-fatwa.net/fatawa/index.php?module=part&id=100

يا رب لما يجيلك إيميل ولا رسالة المرة الجاية تفكّر مرتين قبل ما تبعته لحد