كنت قاعد بفكر في المصطلحات بتاعت الشركات اليومين دول, لقيت انها تثبيت بشكل ستايلش. مجرد استهلاك لمصطلحات موجودة و جعلها واجهة للأسلوب السادي في التعامل, و يبدو من الكلام مع ناس كتير ان دا أصبع العادي في أغلب الشركات المصرية هذه الأيام. المصطلحات دي بتحفظ الصورة الاجتماعية و تخبي البلاوي اللي بتحصل ورا الصورة دي.
و دا تفسير لشوية مصطلحات بتتكرر لحد ما أصبحت بدون معنى:
Ownership
يعني سيبك من القانون, انتا هاتبات هنا لحد ما الشغل يخلص و يعجبني
Self-learner
يعني مالكش تدريب عندنا ولا مساعدة, عندك وصلة النت و مع نفسك, اتشقلب و خللص
Cross-functional
يعني هاتعمل كل حاجة عشان لقمة العيش, لو حتى هاتشتغل مسند كرسي
Presentation skills
يعني عايزينك صايع تقرطس زبون لو اتزنقنا و احتجنالك, مع إنك شغلك مافيهوش تعامل مع زباين
Passionate
يعني هاتشوف القرف و لازم تلاقي طريقة تصبّرك
Work in small teams
هاتعمل نومة العازب و ماحدش هايوريك وشه, تعامل مع نفسك
Something is a plus
يعني قدّم السبت (أحسنلك تكون عارفها) عشان ماتتزنقش قدام في البتاعة دي و تقلل أيام السهر
Agile environment
يعني الجود بالموجود و مشّي نفسك بالمعلومات اللي اديتهالك و خللص في يومين
و بكدا لو حاولت تترجم أي جملة "شيك" بتسمعها فممكن تلاقي قدامك فجأة مقاول أنفار ببدلة و أيباد ... إنها سخرة القرن الحادي و العشرين يا سادة. ربنا يرحمنا و يجنبنا شرور المقاولين و السماسرة.
